Sjö handteknir vegna fjöldamorðanna í Srebrenica

Lögregla í Serbíu hefur handtekið sjö menn sem sakaðir eru um að hafa átt þátt í fjöldamorðunum í Srebrenica árið 1995. Mennirnir eru grunaðir um að hafa myrt rúmlega þúsund múslíma í vöruskemmu í útjaðri Srebrenica.

Í frétt BBC kemur fram að serbneskir og bosnískir saksóknarar segi sjömenningarnir vera meðal fyrstu sem eru handteknir vegna morðanna.

Serbnesk yfirvöld hafa áður tekið menn höndum vegna fjöldamorðanna sem tóku þó ekki beinan þátt í morðunum.

Serbar framseldu hershöfðingjann Ratko Mladic til Alþjóðastríðsglæpadómstólsins árið 2011, en hann er sakaður um að hafa skipulagt fjöldamorðin.

Fjöldamorðin í Srebrenica eru einu grimmdarverkin í Evrópu frá lokum síðari heimsstyrjaldarinnar sem Sameinuðu þjóðirnar hafa skilgreint sem þjóðarmorð.

Áætlað er að um átta þúsund bosnískir karlmenn og drengir hafi verið drepnir í Srebrenica á þriggja daga tímabili í júlí 1995.