Emma hjá Chelsea vill taka upp Rooney-regluna

Emma Hayes, knattspyrnustjóri kvennaliðs Chelsea, er eina konan sem stýrir liði í ensku kvennadeildinni í fótbolta og hún vill að enska sambandið geri meira í því að hjálpa konum að komast að hjá enskum félögum.

Emma vill að enska sambandið taki upp svokallaða Rooney-reglu úr NFL-deildinni en í stað þess að reglan snúist um að gefa minnihlutahópum eða lituðu fólki tækifæri á því að fara í starfsviðtöl, eins og í NFL-deildinni, þá vill Emma að félög beri skylda til að ræða við konur þegar starf losnar.

Það eru ekki margar konur sem stýra liðum í fótboltanum í Englandi. „Við verðum að fá félögin til að taka áhættu í leit sinni að rétta aðilanum,“  sagði hin 38 ára gamla Emma Hayes við BBC.

„Staðan er bara þannig að það eru ekki margar kvenþjálfarar sem hafa topp þjálfararéttindi en það mun breytast. Það sem þarf samt aðallega að breytast er að konur fá tækifæri á því að fara í viðtöl þegar þjálfarastörf losna," sagði Hayes.

„Ef konur fá ekki starfið þá er það í fínu lagi en hægt og rólega munum við taka skrefin í rétta átt," sagði Hayes.  

„Þeir hafa Rooney-reglu í Bandaríkjunum og um leið og það koma upp fleiri konur með meiri þekkingu og meiri reynslu þá þurfa þær að fá tækifærið til að kynna sig fyrir stjórn félaganna," sagði Hayes.

„Ég er stolt af foreldrum mínum fyrir að gefa mér sjálfstraustið til þess að koma mér í þessa stöðu. Ég vona að ég sé fyrirmynd fyrir aðra kvenþjálfara sem eru að koma upp. Ég trúi því líka að það séu fleiri konur sem telja sig geta þetta líka. Ef ég hjálpað þeim eitthvað að stíga þetta skref þá er ég stolt af því líka," sagði Hayes.

Emma Hayes hefur ráðið ríkjum hjá Chelsea síðan 2012 og þær Edda Garðarsdóttir og Ólína Guðbjörg Viðarsdóttir spiluðu hálft tímabil fyrir hana árið 2013.