„Mjög sárt þegar svona kemur upp“

Glassúr sem innihélt eggjaduft var framleiddur fyrir mistök af Kötlu og fór í dreifingu nú fyrir bolludaginn. Þetta segir Tryggvi Magnússon, framkvæmdastjóri fyrirtækisins, í samtali við Vísi. Hann segist taka fulla ábyrgð á þeim mistökum.

Aðspurður hvernig svona geti gerst tvisvar á nokkrum árum, að glassúr frá fyrirtækinu sé innkallaður vegna lélegra innihaldslýsinga, segir Tryggvi:

„Í byrjun 2011 þegar fyrra innköllunarmálið kom upp fórum við í það að setja upp alþjóðlegt gæðakerfi til að vera viss um að svona gæti ekki gerst. Það fól í sér að fara í gegnum allar innihaldslýsingar og fer hér inni með starfsfólki og birgjum. Við fengum svo úttekt á fyrirtækinu í október 2014 svo þetta ferli tók svolítinn tíma en við töldum okkur vera með þetta í góðu standi.“

Svo var hins vegar ekki eins og kom í ljós í vikunni þegar þriggja ára stúlka var hætt komin vegna eggjadufts sem leyndist í glassúr frá fyrirtækinu.

„Við vorum í vöruþróun hér innanhúss með glassúr og vorum að vinna með uppskrift sem innihélt eggjaduft. Áður hafði ekki verið eggjaduft í glassúrnum en fyrir mistök fer nýja uppskriftin í framleiðslu en gömlu innihaldslýsingarnar á umbúðirnar. Okkur finnst þetta auðvitað afskaplega leiðinlegt og við brugðumst strax við þegar við heyrðum af þessu og innkölluðum vöruna,“ segir Tryggvi.

Hann segir að fyrirtækið hafi í beinu framhaldi kannað hvort eggjaduftið leyndist í fleiri vörum frá fyrirtækinu en svo reyndist ekki vera.

„Gæðakerfi fyrirtækisins er tekið út tvisvar á ári, einu sinni á ári af heilbrigðiseftirlitinu og einu sinni af erlenda eftirlitsaðilanum sem við erum í samstarfi við. Í þessu tilfelli er það því miður þessi mannlegi þáttur sem klikkaði og við getum ekki annað en ítrekað að það er mjög sárt þegar svona kemur upp.“