Eldur kom upp í suður-afrískri gullnámu

486 suður-afrískir námamenn sluppu ómeiddir eftir að eldur kviknaði í gullnámu skammt frá Jóhannesarborg. Eldurinn kviknaðir á rúmlega tveggja kílómetra dýpi snemma í morgun.

Þegar búið var að slökkva eldinn voru tæplega fjögurhundruð mannanna komnir upp á yfirborðið en hluti þeirra var enn innikróaður. Á sjöunda tímanum í kvöld voru enn átján manns innilokaðir en þeim hefur öllum verið bjargað núna. Björgunarmenn frá Harmony Gold Mining Company, fyrirtækinu sem á námuna, fóru niður og komu mönnunum til aðstoðar.

„Ég vonast til þess að allir Suður-Afríkumenn biðji fyrir námamönnunum og fjölskyldum þeirra á þessari stund,“ sagði Jacob Zuma, forseti Suður-Afríku, skömmu áður en þeim var bjargað.