„Miðað við þessi orð þá hef ég miklar á­hyggjur“

Kári Sigurðsson, formaður Sameykis, var gestur í kvöldfréttum Sýnar í kvöld, fimmtudaginn 25. júní, en hann segir andrúmsloftið hafa verið gríðarlega þungt í ráðhúsinu í dag er átján starfsfólki á skrifstofu borgarinnar var sagt upp samtímis.

Tímasetningin komi helst á óvart

„Það var bara gríðarlega þungt yfir starfsfólkinu sem maður hitti, en ég var auðvitað bara í anddyrinu. Maður getur ekki sett sig í spor starfsfólksins sem var þarna innandyra,“ segir Kári og bætir við að „þetta hefur bæði verið áfall auðvitað fyrir allt fólkið sem er á skrifstofunni og sérstaklega fyrir þau sem að var tilkynnt um uppsögn í dag.“

Pétur Marteinsson, oddviti Samfylkingarinnar í Reykjavík, sagði í samtali við fréttamann Sýnar á fimmta tímanum í dag að niðurskurðurinn hefði verið viðbúinn. Kári tekur undir það en segist aðallega furða sig á tímasetningunni.

Er þetta samt eitthvað sem kemur ykkur á óvart, þ.e.a.s. umfang þeirra sem missa vinnuna í dag?

„Ég get kannski ekki sagt að þetta komi mér á óvart, þessar aðgerðir, þau töluðu mikið um þetta í aðdraganda kosninganna. Tímasetningin kemur mér kannski á óvart. Það er ansi stutt síðan þau, meirihlutinn, tók við og ég svona velti fyrir mér hversu vel ígrundaðar þessar ákvarðanir eru,“ segir Kári.

Hefur miklar áhyggjur af framhaldinu

Hann segist ekki muna eftir öðru eins í borginni síðasta áratuginn og telur í fljótu bragði að hópuppsagnir árið 2010 komi næst því að vera í líkingu við þessar í dag.

„Svona í fljótu bragði þá þarf maður kannski að fara til ársins 2010, þegar hópuppsagnirnar í Orkuveitunni voru, til þess að horfa á eitthvað, en þá er það önnur stærðargráða, meiri heldur en er í dag. En þetta er auðvitað grafalvarlegt, sérstaklega í ljósi stöðunnar í samfélaginu í dag,“ segir Kári.

Hann segist jafnframt hafa verulegar áhyggjur af framhaldinu, ekki einungis fyrir félagsfólk Sameykis heldur samfélagið allt, og veltir því upp hvort það hafi verið rangt að lesa það á milli línanna í kosningabaráttunni í vor að bæta ætti við grunnþjónustu borgarinnar.

„Hildur kemur inn á það að hún sé að fara að verja grunnþjónustuna. Maður svona hélt að maður hefði lesið á milli línanna í þessari kosningabaráttu að það ætti að bæta ef eitthvað væri við grunnþjónustuna, þannig að ég hefði nú haldið þá að þessar skipulagsbreytingar myndu þá fela í sér að það yrði bætt við í grunnþjónustunni, en miðað við þessi orð þá hef ég miklar áhyggjur.“