Tvær dætranna aftur komnar til móðurinnar

Tvær af dætrum sænsku konunnar sem sökuð er um að hafa læst börn sín inni um margra ára skeið eru komnar aftur heim til móður sinnar á heimilinu í Bromölla á Skáni.

Yngsta dóttirin hefur þó ekki snúið aftur. „Ég veit ekki hvar hún er,“ segir Thomas Ljungdahl, lögmaður móðurinnar.

Dómstóll í Kristianstad úrskurðaði í síðustu viku að fyrirliggjandi gögn réttlættu ekki að konan yrði úrskurðuð í gæsluvarðhald og var henni í kjölfarið sleppt.

Að sögn saksóknara hafði móðirin komið í veg fyrir að börnin yfirgæfu íbúðina um margra ára skeið. Dætur konunnar eru 23, 24 og 32 ára gamlar.

Saksóknarinn Pär Andersson segist í samtali við Dagens Nyheter enn gruna konuna um ólöglega frelsissviptingu, en án frekari sannana er mögulegt að rannsóknin verði lögð niður.