Fólk kaupir hjálpartæki fyrir kynlífið í byggingavöruverslunum og gæludýrabúðum

Eigendur erótískra verslana segja að sala á svokölluðum hjálpartækjum ástarlífsins hafi stóraukist í kjölfar útgáfu bókarinnar 50 Shades of Grey fyrir tveimur árum. Eigendurnir búa sig nú undir annan kipp í sölu í kjölfar frumsýningar á samnefndri kvikmynd. En þeir eru ekki þeir einu sem þurfa að búa sig undir aukna eftirspurn, að sögn formanns BDSM-félags Íslands. Ljóst er að fólk hugsar út fyrir rammann þegar það kemur að þessum efnum því Magnús Hákonarson, formaður BDSM á Íslandi, bendir á að fólk sæki í auknum mæli í byggingavöruverslanir á borð við Bauhaus og BYKO eftir hjálpartækjum innblásnum af bókinni. Ber þá helst að nefna reipi, teip, dragbönd og fleira í þeim dúr.

Hann segir að fólk leiti einnig í gæludýrabúðir, því þar má kaupa ódýrari ólar sem nota má í svefnherberginu.

„Bauhaus hefur til dæmis verið vinsæll áfangastaður þeirra sem vilja bæta í safnið. Það er einfaldlega mun ódýrara en að versla í erótískum verslunum. Þú færð oft ódýrari og endingabetri vöru þar.“

Magnús bætir við að gæludýraverslanir fái einnig sinn skerf af viðskiptavinum í kjölfar aukinnar upplýsingar um BDSM, þar sem bestu hundaólarnar megi oftar en ekki nálgast þar og á hagstæðu verði.

Hvorki starfsmenn Bauhaus né BYKO könnuðust við að hafa heyrt um að verið væri að versla við þá með BDSM sérstaklega í huga þegar blaðamaður hafði samband, en töldu það svo sem ekki ólíklegt. Erlendis þekkist það að byggingavöruverslanir búi sig nú undir aukna eftirspurn, eftir að myndin 50 Shades of Grey verður frumsýnd. Til að mynda hefur breski byggingavöruverslunarrisinn B&Q gert kröfu til starfsfólks síns að það lesi bækurnar. Þannig sé það reiðubúið til að aðstoða fólk við val á reipi og teipi eftir bestu mögulegri getu.

Hér að neðan má sjá umfjöllun sjónvarpsþáttarins Today um atriði úr 50 shades of Grey sem gerist einmitt í byggingavöruverslun og má ætla að þar sé verið að versla eitthvað sem nota má í svefnherberginu.