Fékk að kveikja í húsi morðingja dóttur sinnar

Diena Thompson, móðir stúlku sem var nauðgað og myrt árið 2009, fékk að kveikja í húsi morðingjans þegar slökkvilið stóð fyrir æfingu í síðustu viku.

Somer Thompson, 7 ára dóttur Dienu, var nauðgað og myrt í umræddu húsi í Orange Park í Flórída árið 2009 og kom morðinginn líkinu fyrir á öðrum stað þar sem það fannst nokkru síðar.

Á fimmtudaginn síðasta fékk Diena svo að brenna hús morðingjans til grunna í tengslum við æfingu hjá slökkviliði bæjarins. „Ég var stóri og grimmi úlfurinn í þetta skiptið,“ sagði Diena í samtali við News4Jax.

Jarred Harrell myrti Somer fyrir rúmum fimm árum síðan eftir að hafa rænt henni þegar hún var á leið heim úr skólanum.

Harrell afplánar nú lífstíðardóm og var hús hans fært Thompson-fjölskyldunni að gjöf. Lagði fjölskyldan þá til að það yrði brennt til grunna sem hefur nú verið gert.

Sjá má frétt News4Jax um málið að neðan.