Fjórir urðu fyrir strætó í Lundi

Fjórir urðu fyrir strætó eftir að heitavatnsrör sprakk í bænum Lundi í Suður-Svíþjóð í gærkvöldi. Þykk gufa myndaðist við sprunguna og ökumaðurinn missti stjórn á bifreiðinni sem endaði upp á gangstétt.

Einn maður lét lífið en þar að auki fengu nokkrir brunasár vegna heita vatnsins. Maðurinn sem lést var á hjóli.

Þetta kemur fram á vef Aftonbladet þar sem birt er myndband af slysinu. Atvikið átti sér stað fyrir utan lestarstöðina í Lundi.

Lögreglan lokaði af svæðinu en töluverður glundroði myndaðist vegna vatnsins og slyssins. Þá sáust íbúar beita ýmsum brögðum til að komast leiða sinna.