Bjóða sig fram til stjórnarformanns Bjartrar framtíðar

Brynhildur S. Björnsdóttir og Margrét Marteinsdóttir hafa báðar skilað inn framboði til stjórnarformanns Bjartrar framtíðar en aukaársfundur flokksins fer fram í Stúkuhúsinu á Akranesi næstkomandi laugardag frá klukkan 11-15.

„Þetta verkefni sem snýst um að breyta pólitíkinni og koma henni á annað stig er eitthvað sem skiptir mig miklu máli,“ segir Brynhildur S. Björnsdóttir, aðspurð um hvers vegna hún bjóði sig fram í embættið.

Brynhildur hefur setið í framkvæmdastjórn Bjartrar framtíðar frá stofnun flokksins og er gjaldkeri hans. Hún hefur meðal annars rekið sitt eigið fyrirtæki, starfað við stjórnun og unnið mikið með frumkvöðlum, og langar meðal annars til að tengja pólitíkina betur við atvinnulífið.

Brynhildur hefur nokkrum sinnum tekið sæti á þingi fyrir þingmennina Óttar Proppé og Róbert Marshall og hefur því öðlast ágæta innsýn inn í þingstörfin.

„Starf stjórnarformanns snýr þó meira að innra starfi flokksins og baklandi hans. Mig langar til að sinna því og halda þeirri hugmyndafræði og þeim gildum sem við byggjum á á lofti innan Bjartrar framtíðar.“

En er mikil kosningabarátta á milli ykkar Margrétar?

„Nei, ég held ég geti nú sagt að það sé bara engin kosningabarátta í gangi. Björt framtíð er kannski svolítið öðruvísi en aðrir flokkar að þessu leyti. Hér er bara kærleikur og umhyggja,“ segir Brynhildur.

Gaman að tvær konur skuli bjóða sig fram

Margrét Marteinsdóttir var frambjóðandi Bjartrar framtíðar í borgarstjórnarkosningunum í vor.

„Ég býð mig fram vegna þess að þegar Besti flokkurinn, og síðar Björt framtíð, komu fram fann ég í fyrsta skipti einhverja tengingu við pólitík og að mig langaði að taka þátt. Það hefur ekkert breyst enda mjög góð tilfinning þegar maður finnur þessa tengingu,“ segir Margrét.

Hún starfaði um árabil hjá Ríkisútvarpinu sem fréttamaður en hefur nú söðlað um og starfar sem vert á kaffihúsinu Kaffi Vest. Margrét byrjaði að taka þátt í starfi Bjartrar framtíðar í mars í fyrra.

„Þá var ég að aðstoða í kosningunum og kynntist persónulega því fólki sem starfar í Bjartri framtíð. Mig langar að kynnast því betur en starf stjórnarformannsins snýst meðal annars um að vera í góðu sambandi við fulltrúa flokksins um land allt.“

Er mikil kosningabarátta á milli ykkar Brynhildar?

„Nei, það er það nú ekki. Mér finnst bara ofboðslega gaman að það séu tvær konur að bjóða sig fram sem stjórnarformann flokksins.“