Heiða Kristín kveður stjórnmálin

Heiða Kristín Helgadóttir, stjórnarformaður Bjartrar framtíðar, hefur ákveðið láta af stjórnarformennsku í upphafi nýs árs og þar með hvíla dagleg afskipti af stjórnmálum. Hún greinir frá þessu á Facebook-síðu sinni og tilkynningu til fjölmiðla.

„Á síðastliðnum fimm árum hef ég átt þeirri gæfu að fagna að eiga stóran þátt í því að búa til tvo stönduga stjórnmálaflokka, Besta flokkinn og Bjarta framtíð, og þannig stuðlað að tímabærum breytingum sem ég vona innilega að munu hafa jákvæð áhrif til lengri tíma,“ segir Heiða Kristín.

„Á þessum tímapunkti finnst mér rétt að sleppa takinu, hleypa öðrum að og freista þess að hafa áhrif á samfélagið með öðrum hætti,“ segir Heiða. Hún sé stolt af því sem hún hafi áorkað og sömuleiðis sátt.

 

„... en á sama tíma meðvituð um að þörfin fyrir að opna samfélagið upp og færa það nær nútímanum er ótvíræð. Ég hlakka til að takast á við það verkefni frá nýjum sjónarhól á komandi árum.“