Manndráp í Breiðholti og Hvammstanga komin á borð ríkissaksóknara

Manndrápið í Breiðholtinu þann 25. september síðastliðinn, þar sem kona lét lífið, er komið á borð ríkissaksóknara sem mun taka ákvörðun um hvort ástæða er til að gefa út ákæru. Þetta kemur fram í svari embættisins fyrirspurn Vísis. Greint hefur verið frá því að eiginmaður konunnar, 28 ára karlmaður, sé grunaður um að hafa orðið konunni að bana á heimili þeirra í Stelkshólum.

Maðurinn hefur staðfastlega haldið fram sakleysi sínu og heldur því fram að konan hafi svipt sig lífi. Samkvæmt upplýsingum frá lögreglunni var þrengt að öndunarvegi konunnar svo hún hlaut bana af. Samkvæmt heimildum fréttastofu var notast við einhvers konar band eða snæri við verknaðinn.

Í tilkynningu frá lögreglu kom fram að maðurinn hafði samband við annan aðila sem lét lögreglu vita skömmu eftir miðnætti umrædda nótt. Við komu lögreglu á vettvang vaknaði strax grunur um að andlát konunnar hafi borið að með saknæmum. Börn hjónanna, tveggja og fimm ára, voru á heimilinu nóttina sem konan lést. Í kjölfarið voru börnin í umsjá barnaverndaryfirvalda sem komu þeim í vistun hjá vinafólki hjónanna.

Ríkissaksóknari hefur einnig fengið inn á borð til sín meinta líkamsárás sem varð á Hvammstanga hinn 15. júní síðastliðinn. Maður að nafni Tomasz Grzegorz Krzeczkowski lést þremur dögum síðar. en banamein hans var þungt höfuðhögg, líklega eftir fall. Fjórir voru í fyrstu færðir í gæsluvarðhald vegna málsins en tveimur fljótlega sleppt. Nokkru síðar var hinum tveimur, feðgum sem bjuggu í húsinu þar sem Grzegorz fannst, sleppt úr gæsluvarðhaldi. Þeir sæta farbanni.

Niðurstöðu ríkissaksóknara er varðar ákæru í hópnauðgunarmáli frá því í maí er að vænta á næstu vikum. Þar kærði ung stúlka fimm pilta fyrir nauðgun í heimahúsi. Málið hefur verið á borði saksóknara um nokkurra mánaða skeið en rannsókn lauk í júní.