Hafa fundið flugvélina

Skip sjóhers Singapúr hefur fundið flugvélina frá AirAsia sem brotlenti í Javahafi fyrir tæpum þremur vikum. Myndir náðust af flakinu úr fjarstýrðum kafbáti sem sendur var til botns, en flakið er í um þriggja kílómetra fjarlægð frá staðnum þar sem stél vélarinnar fannst í síðustu viku.

Vélin liggur á 28 metra dýpi og annar vængurinn er enn fastur við hana, samkvæmt AP fréttaveitunni.

Flugvélin hvarf af ratsjá 28. desember á leiðinni frá Indónesíu til Singapúr. 162 einstaklingar voru um borð. Aðeins 50 lík hafa fundist á þremur vikum, en veður hefur hægt á björgunaraðgerðum.

„Svörtu kassar“ vélarinnar fundust á mánudaginn og þriðjudaginn, en þeir eru lykilatriði rannsakenda til að uppgötva hvers vegna vélin brotlenti.