Farið fram á þyngri dóm í Shaken baby-málinu

Ríkissaksóknari fer fram á að dómur yfir Scott James Carcary, sem dæmdur var í fimm ára fangelsi fyrir að hafa orðið valdur að dauða fimm mánaða dóttur sinnar, verði þyngdur. Þá er þess krafist að hann greiði allan máls- og sakarkostnað. Málflutningur ákæruvaldsins hófst í Hæstarétti Íslands í morgun.  

Dómur féll yfir Carcary í Héraðsdómi Reykjavíkur í apríl en hann var ákærður fyrir stórfellda  líkamsárás með því að hafa í mars í fyrra hrist dóttur sína svo harkalega að hún hlaut blæðingu í heila sem leiddi til dauða hennar.

Sjá einnig:Amman segir móðurina hafa hágrátið en föðurinn ekki hafa fellt tár

Sigríður J. Friðjónsdóttir flytur málið fyrir hönd ákæruvaldsins. Hún sagði að strax hefði vaknað grunur um að faðir barnsins, Carcary, hefði valdið dauða þess. Ekkert benti til þess að móðir þess hefði gerst sek um að hafa veitt því áverkana, hún hefði ekki haft nokkra ástæðu til þess. Daginn örlagaríka hefðu verið teknar myndir skömmu áður en móðirin hélt til vinnu sem sýndu barnið fullkomlega heilbrigt, brosandi og í góðu ásigkomulagi. Barnið hefði hins vegar byrjað að gráta þegar faðir þess tók það í fangið.

Lýst sem skaplausum manni

Þennan dag gaf móðir stúlkunnar henni að drekka um klukkan 17.15 og svæfði hana í kjölfarið. Carcary var á meðan á efri hæð íbúðarinnar í tölvunni. Sigríður sagði íbúð þeirra litla og því hefði það ekki farið framhjá Carcary hefði hún skaðað barnið á einhvern hátt.

Móðirin tók strætó í vinnuna klukkan 17.45. Skömmu eftir að hún var mætt í vinnu hringdi Carcary í hana og tjáði henni það að barnið gréti hástöfum. Óskaði hann ráða og hvatti hún hann til að fara með stúlkuna í göngutúr sem hann og gerði.

Sjá einnig:Faðirinn dæmdur í fimm ára fangelsi

Barnið hélt áfram að gráta og taldi Sigríður líklegt að Carcary hefði misst stjórn á skapi sínu í kjölfarið. Honum sé þó lýst sem skaplausum manni en að geðrannsókn hefði leitt það í ljós að hann yrði aldrei reiður en reyndi ávallt að koma sér úr erfiðum aðstæðum.

„Þessar aðstæður gat hann ekki flúið,“ sagði Sigríður.

Verjandi Carcary fór fram á sýknu og til vara að hann verði dæmdur til vægstu mögulegu refsingar og að sakar- og málskostnaður verði greiddur úr ríkissjóði. Sagði hann að það væri með öllu ósannað að Carcary hefði verið sá sem valdið hefði dauða barnsins og að sönnunargögnum væri ábótavant. Lagði hann fram ýmis gögn máli sínu til stuðnings, dóma sem fallið hafa ásamt rannsóknum sem gerðar hafa verið á undanförnum árum. Þær gæfu til kynna að „shaken baby syndrome“ eða ungbarnahristing væri ekki hægt að sanna með krufningaskýrslu einni. Efnaskiptasjúkdómar eða bólusetningar gætu valdið heilabólgu og/eða heilablæðingu sem og fall á höfuðið. 

Scott James Carcary hefur ávallt haldið fram sakleysi sínu í málinu. Hann áfrýjaði því málinu til Hæstaréttar og stendur málflutningur yfir í dag.