Defoe til Sunderland

Jermain Defoe hefur skrifað undir þriggja og hálfs árs samning við enska úrvalsdeildarliðið Sunderland.

Defoe, sem er 32 ára, kemur til Sunderland frá Toronto FC sem leikur í MLS-deildinni í Bandaríkjunum.

Í staðinn fær Toronto bandaríska framherjann Jozy Altidore sem náði sér engan veginn á strik í búningi Sunderland, en hann skoraði aðeins þrjú mörk í 50 leikjum fyrir Svörtu kettina.

Defoe er þrautreyndur markaskorari, en hann hefur skorað 124 mörk í ensku úrvalsdeildinni fyrir Tottenham, West Ham og Portsmouth. Hann er í 14. sæti yfir markahæstu leikmenn í sögu úrvalsdeildarinnar.

Sunderland þarf sárlega á markaskorara að halda en liðið hefur aðeins skorað 18 mörk í úrvalsdeildinni í vetur. Aðeins Aston Villa hefur skorað færri (11).

Defoe gæti leikið sinn fyrsta leik með Sunderland gegn Tottenham í dag. Leikurinn hefst klukkan 15:00 og verður sýndur í beinni útsendingu á Stöð 2 Sport 5. Þá verður einnig hægt að fylgjast með leiknum í miðstöð Boltavaktarinnar hér á Vísi.

HERE IT IS: #WelcomeJermain #ScarfPic @IAmJermainDefoe pic.twitter.com/xCrrs4wxP0

— Sunderland AFC (@SunderlandAFC) January 16, 2015