Kynjaður snjómokstur í Stokkhólmi

Borgaryfirvöld í Stokkhólmi hafa ákveðið að snjómokstur á gangstéttum og hjólabrautum skuli framvegis njóta forgangs á snjóþungum dögum.

Umferðargötur verða framvegis færðar aftar í forgangsröðuninni samkvæmt nýjum reglum borgarinnar. Með þessu er ætlunin að gera borgina jafn örugga fyrir karla – sem eru hlutfallslega líklegri til að vera bílstjórar – og konur – sem eru ólíklegri til að setjast á bakvið stýrið.

Í frétt The Local segir að hugmyndin sé að bæði kyn njóti jafnrar verndar gegn því að renna til á ísnum á köldum dögum í borginni, en rannsóknir sýna að konur séu nú líklegri að lenda í slíkum slysum yfir vetarmánuðina.

„Tölur sýna að gangandi vegfarendur og hjólreiðafólk slasast oftar en þeir í sem eru í bíl. Þess vegna er mikilvægt að reyna að koma í veg fyrir að fólk í þessum hópum hrasi og meiði sig. Þess vegna ætlum við í framtíðinni að forgangsraða snjómokstri og meðhöndlun í þágu gangstétta og hjólabrauta,“ segir Daniel Helldén, varaborgarstjóri borgarinnar og yfirmaður umferðardeildar borgarinnar, í samtali við The Local.

Borgaryfirvöld samþykktu hina nýju stefnu síðastliðinn föstudag, en reglurnar munu taka gildi í nóvember næstkomandi. Gamla kerfið gerði ráð fyrir að stofnæðar yrðu ruddar fyrst, svo svæði þar sem karlmenn hafa vanalega unnið líkt og á byggingarsvæðum, og loks gangstéttir og hjólabrautir.