Átakið Veganúar komið af stað

Samtök grænmetisæta á Íslandi taka þátt í alþjóðlegu átaki sem nefnist Veganúar. Þeir sem taka þátt í átakinu skuldbinda sig til þess að neyta engra dýraafurða í janúarmánuði.

Á ensku kallast hugtakið Veganuary og tekur mikill fjöldi fólks víðsvegar í heiminum þátt í átakinu.

„Markmið Veganúar er að draga úr þjáningu dýra með því að hvetja fólk, frá öllum heimshornum, til að gerast vegan í einn mánuð,“ segir á vefsíðu íslenskra grænmetisæta.

Þar segir einnig um veganisma:

„Það eru margar og fjölbreyttar ástæður fyrir því að fólk gerist vegan.

Fyrir flesta er dýravernd aðal hvatinn. Suma langar að líða betur og hafa jákvæð áhrif á jörðina. Aðrir sækjast í áskorunina en margir nota Veganúar sem áramótaheit og líta á mánuðinn sem heilsusamlega byrjun á árinu.

Prófaðu að gerast vegan í mánuð og upplifðu nýjar víddir í matargerð og líkamlegri og andlegri vellíðan. Þú átt ekki eftir að sjá eftir því í lok Veganúar.

Veganismi er stærsta réttlætisbaráttuhreyfingin í heiminum í dag.“

Á vefsíðunni er fjöldi dýra sem slátrað hefur verið hér á landi tiltekinn, en samanlagður fjöldinn hleypur á hundruðum þúsunda. Þeir sem vilja taka þátt í átakinu geta fylgst með á Facebook-síðu þeirra sem eru vegan á Íslandi.