Fær milljón dollara á mánuði í Kína

Enn berast fréttir af knattspyrnumönnum sem hafa samið við lið í kínversku ofurdeildinni.

Nú er Asamoah Gyan, landsliðsfyrirliði Ghana, genginn í raðir Shanghai SIPG en knattspyrnustjóri liðsins er Svíinn Sven-Göran Eriksson. Kaupverðið hefur ekki verið gefið upp en talið er að Gyan fái um 250.000 bandaríkjadala í vikulaun.

Gyan kemur til Shanghai frá Al-Ain í Sameinuðu arabísku furstadæmunum þar sem hann hefur leikið síðan 2011. Hann skoraði 113 mörk í 104 leikjum fyrir Al-Ain.

Gyan hefur leikið 90 landsleiki fyrir Ghana og skoraði 48 mörk. Gyan hefur gert sex mörk á HM, fleiri en nokkur annar afrískur leikmaður í sögu heimsmeistaramótsins.