Krefjast samkynja hjónavígslna

Þúsundir manna gengu fylktu liði um margar borgir Ástralíu um helgina til að krefjast þess að lög um að leyfa hjónabönd samkynja fólks nái fram að ganga á ástralska þinginu.

Þingmenn úr Frjálslynda flokknum, sem er stjórnarflokkurinn í Ástralíu, ásamt þingmönnum í Verkamannaflokknum, sem er stærsti stjórnarandstöðuflokkurinn, munu freista þess að koma málinu á dagskrá þingsins á næstu dögum.

Tony Abbott, forsætisráðherra Ástralíu, hefur ætíð verið mótfallinn hjónaböndum samkynja fólks en hann hefur gert lítið úr þverpólitísku útspili fyrrnefndra þingmanna.