Maður lést er hann varð fyrir skriðdreka

Eiginmaður forstjóra sælgætisframleiðandans Jelly Belly kramdi mann til dauða fyrir slysni er hann keyrði um landsvæði fjölskyldunnar í Fairfield í Kaliforníu á skriðdreka sem notaður var í seinni heimstyrjöldinni.

Slysið átti sér stað um sl. helgi á ættarmóti fjölskyldunnar sem á og rekur fyrirtækið sem framleiðir sælgætið Jelly Belly, Fjölskyldufaðirinn og fyrrum forstjóri fyrirtækisins, Herman Rowland eldri, er þekktur fyrir áhuga sinn á gömlum stríðstólum sem hann safnar í gríð og erg.

Slysið atvikaðist þannig að maðurinn sem lést sat fremst á skriðdrekanum en féll framfyrir skriðdrekann þegar honum var ekið niður brekku. Ekki tókst að stöðva skriðdrekann í tæka tíð og lenti maðurinn undir skriðdrekanum og lést samstundis. Ekki er talið að stjórnandi skriðdrekans hafi verið undir áhrifum vímuefna þegar slysið átti sér stað.