Flutu sofandi að feigðarósi

Í aðdraganda stríðsátakanna í Úkraínu gerðu hvorki bresk stjórnvöld né aðrir ráðamenn í Evrópusambandinu sér neina grein fyrir því hve andsnúnir Rússar voru nánari tengslum Úkraínu við Evrópusambandið.

Þetta kemur fram í ítarlegri skýrslu frá Evrópunefnd lávarðadeildar breska þingsins, að Vesturlönd hafi flotið sofandi að feigðarósi hvað þetta varðar.

Nefndin gagnrýnir stjórnvöld harðlega fyrir ómarkviss vinnubrögð og skilningsleysi á ástandinu. Það stafi ekki síst af því að dregið hafi verið úr fjárframlögum til greiningar og upplýsingasöfnunar í breska utanríkisráðuneytinu. Vantað hafi fleiri sérfræðinga um Rússland í ráðuneytið til þess að hægt væri að lesa betur í stöðuna.

Þá hafi forysta Evrópusambandsins gefið sér að Rússland væri á góðri leið með að verða lýðræðisríki, en sú forsenda hafi verið of bjartsýn: „Aðildarríkin hafa verið lengi að endurmeta samskiptin og aðlagast veruleika þess Rússlands sem við eigum við að etja í dag,“ segir í skýrslunni.

„Athafnir Rússa þarf að skoða innan bæði hins sérstaka sögulega samhengis Úkraínu sjálfrar og innan víðara samhengis hegðunar Rússa í nágrannalöndunum,“ segir í skýrslunni. „Staðan nú er mjög frábrugðin því sem var árið 1991 þegar Sovétríkin liðuðust með friðsamlegum hætti í sundur í fimmtán ríki.“

Breska stjórnin hafnar þessari gagnrýni. David Cameron, forsætisráðherra Bretlands, segir aðalatriðið núna vera að senda Rússum skýr skilaboð um að það sem gerst hafi sé óviðunandi: „Það verður að standa við vopnahléið, og ef það gerist ekki þá verða frekari afleiðingar, frekari refsiaðgerðir,“ hefur BBC eftir honum.

Skýrslan var birt í gær, en þá var rétt ár liðið frá blóðugasta degi mótmælanna í Kænugarði þegar meira en 50 manns létu lífið. Um það bil tveimur mánuðum seinna hófust svo stríðsátökin, sem nú hafa kostað meira en fimm þúsund manns lífið.