Tíu tíma tók að telja peningana

Lögregla á Ítalíu hefur gert upptækar 53 milljónir í fölsuðum evruseðlum sem fundust í kjallara íbúðarhúss í þorpinu Villaricca, nærri Napólí, á Ítalíu. Lögreglan kynnti fund sinn á blaðamannafundi í gær. Er þetta með hæstu upphæðum sem fundist hafa í fölsuðum seðlum.

Upphæðin var í 100, 50, 20 og 10 evruseðlum og tók lögreglu um tíu stundir að telja þá í höndunum, að sögn La Repubblica. Peningatalningarvélar réðu ekki við seðlana, sem þó eru sagðir haganlega gerðir.

Húseigandinn, 51 árs karl að nafni Antonio Sgambat, var handtekinn á staðnum. Hann verður kærður fyrir sinn þátt en lögregla rannsakar enn hvar seðlarnir voru framleiddir og hvernig þeim var komið í umferð.