Undrast orðaval þingmanns

Þörf er á þjóðarsókn gegn spillingu, sagði Ásmundur Friðriksson þingmaður í ræðu á þingi í gær. Hvatti hann íslenska þjóð til þess að hætta viðskiptum við Símann.

Tilefnið var sala hlutabréfa í Símanum í október þegar vildarvinir Arion banka fengur að kaupa hluti í Símanum áður en almennt útboð fór fram. Upplýsingafulltrúi Símans undrast orðaval þingmannsins.

Ásmundi misbýður það fyrirkomulag sem viðhaft var við sölu bréfa bankans í fyrirtækinu.

Kallaði hann það illa fengið fé og hvatti einstaklinga til að skila ránsfengnum, eins og hann orðaði það. „Skítastuðullinn er kominn upp í öll rjáfur eins og hann var hér fyrir hrun,“ sagði þingmaðurinn.

„Ég hvet þingið til að hætta viðskiptum við þetta fyrirtæki. Það ætla ég að gera og ég hvet þjóðina til þess að segja upp viðskiptum við þetta fyrirtæki.“

Gunnhildur Arna Gunnarsdóttir, upplýsingafulltrúi Símans, bendir á að starfsfólk Símans hafi það að markmiði að veita framúrskarandi þjónustu á fjarskiptamarkaði. 

Þar fari stolt starfsfólk sem standi sig vel. Hafa beri í huga að Síminn sé í meirihlutaeigu lífeyrissjóða landsins. Hvernig Arion banki seldi meginþorra hlutar síns í fyrirtækinu hafi verið hans ákvörðun.

„Það er umhugsunarvert að þingmaður beiti því valdi sem hann hefur til þess að hvetja fólk til að hverfa frá viðskiptum við þetta fyrirtæki í von um að skaða framtíð þess. Það er dapurlegt að hugsa til þess að hafi orð hans áhrif skerðist ekki aðeins hagur lífeyrissjóða í eigu landsmanna heldur einnig þeirra 800 starfsmanna sem vinna hjá samstæðunni og fjölskyldna þeirra.“

Sala til viðskiptavina var liður í því að minnka hlut bankans fyrir útboðið, ekki með því að veita viðskiptavinum afslátt af verðinu heldur með því að gefa þeim kost á að kaupa nokkru stærri hlut en ella.