„Raðmorðinginn“ Thomas Quick frjáls ferða sinna

Dómstóll í Svíþjóð hefur úrskurðaði í morgun að Sture Bergwall muni ekki lengur þurfa að sæta meðferð á geðdeild. Lögmaður Bergwall greindi frá þessu í samtali við sænska fjölmiðla.

Bergwall var áður þekktur undir nafninu Thomas Quick og var lengi talinn mesti raðmorðingi Norðurlandanna.

Bergwall játaði á sig átta morð sem framin voru í Svíþjóð á árunum 1976 til 1988, auk þess að hann sagðist hafa framið á þriðja tug morða í Finnlandi og Noregi.

Árið 2008 dró hann játningar sínar skyndilega til baka þar sem hann sagðist bæði hafa verið undir áhrifum sterkra lyfja og athyglissjúkur þegar hann játaði á sig morðin.

Árið 2013 var hann svo hreinsaður af öllum átta dómum sem hann hlaut fyrir morð. Honum var þó áfram gert að sæta meðferð á geðdeild, en eins og áður segir er Bergwall nú frjáls ferða sinna.

„Nú er ég frjáls. Raunverulega frjáls,“ sagði Bergwall þegar hann yfirgaf réttarsalinn í morgun eftir úrskurð dómsins.