Kolbeinn byrjaði í sigri Ajax

Ajax marði 1-0 sigur á Go Ahead Eagles í hollensku úrvalsdeildinni í fótbolta í dag. Kolbeinn Sigþórsson var í byrjunarliði Ajax sem náði tveggja stiga forystu á toppi deildarinnar með sigrinum.

Ajax byrjaði leikinn frábærlega og fékk Kolbeinn gott færi strax á annarri mínútu leiksins sem Eloy Room varði.

Ajax náði ekki að nýta yfirburðina í upphafi leiks og heimamenn í Go Ahead Eagles komust betur inn í leikinn sem breytist í baráttu á miðjunni þar sem liðin sköpuðu sér fá færi.

Lasse Schöne kom inn á fyrir Kolbeinn á 65. mínútu og skoraði sá danski eina mark leiksins níu mínútum síðar þegar hann fylgdi eftir eigin aukaspyrnu og skoraði af um 20 metra færi með vinstri fæti.

Ajax er nú með 43 stig í efsta sæti deildarinnar, með tveimur stigum meira en Vitesse sem gerði 1-1 jafntefli við NEC Nijmegen fyrr í dag.

Nýliðar Go Ahead Eagles eru með 23 stig í 12. sæti deildarinnar í mjög jafnri fallbaráttu.