Falcao gæti spilað á HM í sumar

Skurðlæknirinn sem framkvæmdi aðgerðina á hné kólumbíska framherjans RadamelsFalcao er bjartsýnn á að hann geti spilað á HM í Brasilíu í sumar.

Falcao var tæklaður af leikmanni utandeildarliðs í franska bikarnum í lok janúar og skaddaði liðbönd í hné. Vanalega eru menn frá í sex mánuði vegna slíkra meiðsla og var því eðlilega talið að hann yrði ekki með á HM.

Endurhæfing Falcao gengur vel og telur skurðlæknirinn Jose Carlos Noronha að hann geti mögulega spilað á HM eftir allt saman. Hann hittir Kólumbíumanninn í Portúgal í lok febrúar og tekur þá stöðuna á honum.

„Hvert mál er frábrugðið því næsta en honum gengur vel í endurhæfingunni. Ég trúi því ennþá að hann geti spilað á HM. Það er ekkert sem mælir á móti því núna,“ segir Jose Carlos Noronha.

Það yrði auðvitað gríðarlegur styrkur fyrir Kólumbíu að geta tekið Falcao með sér á HM þó hann yrði ekki í fullkomnu leikformi. Hann hefur verið einn allra skæðasti framherjinn í Evrópu undanfarin ár en hann er búinn að skora 81 mark í 110 leikjum á síðustu þremur tímabilum.