Minjavörður gerir ráð fyrir því að húsið verði gert upp

„Það sem ég sá er í rauninni að húsið er betur farið en ég átti von á. Það er líka meira varðveitt í því en ég átti von á. Ég hafði heyrt að mörgu hefði verið skipt út en það er ekki. Það er margt upprunalegt í húsinu,“ segir Þór Hjaltalín, minjavörður Vesturlands.

„Ég er hér í Bolungarvík fyrst og fremst til að afla gagna. Bæði varðandi húsið og sögu þess og svo skoða ástand hússins.“

Hann skoðaði húsið að Aðalstræti 16 í Bolungarvík í morgun, en það varð frægt í síðustu viku þegar Valdimar Lúðvík Gíslason skemmdi það með vinnuvél.

Varðandi upprunalega hluti í húsinu nefnir Þór að upprunalegan panil sé enn að finna þár ásamt öðru. Hann segir einnig að sé húsið borið saman við lýsingu Vilmundar Jónssonar, landlæknis, af húsinu á Látrum í Aðalvík, sé ljóst að þetta sé upprunaleg gerð hússins.

„Það hafa orðið á því töluverðar skemmdir, eins og menn sjá á myndum. Það versta í þessu er kannski það að skorsteinninn hafi verið brotinn. Því miður.“

Þór segir mikinn burð vera í skorsteininum og í raun hafi það bjargað húsinu að hann skyldi hafa stoppað á millivegg.

„Ef hann hefði farið alveg niður hefði hann hugsanlega rifið þakið með sér. Þá hefði verið mikið minna eftir af húsinu. Þessi milliveggur hefur bjargað húsinu en skorsteinninn liggur og togar í þakið. Það er spurning hvort það þurfi ekki að rétta á þessu fyrir veturinn,“ segir Þór.

Húsið er í fínu standi

„Við gátum tekið múklæðningu aðeins utan af húsinu og undir henni er viðurinn merkilega heill og ófúinn. Það er aðeins fúi neðst í borðunum við fótstykkið. Að öðru leyti er þetta í fínu standi. Kjallarinn sömuleiðis. Þetta er góður hlaðinn grunnur sem hefur verið múraður að innan. Hann er þurr og fínn, þannig að golfbitar og annað er einnig í fínu standi.“

„Ég á ekki von á öðru en að menn ráðist í það að gera húsið upp og laga það. Þetta er ekki það stórt hús og það gætu margir ráðist í þetta verk og gert það vel,“ segir Þór. Hann tekur þó fram að bærinn eigi húsið og ekki er komið í ljós hvað menn vilji gera með það.

Nokkrir aðilar hafa undanfarin ár lýst yfir áhuga á því að taka við húsinu.

„Oft er nú með svona hús að það þarf að finna þeim hlutverk og einhverja sem vilja taka þau að sér og tryggja varðveislu þeirra. Það held ég að sé ekki vandamálið í þessu tilfelli.“

Þannig að húsið lítur í raun merkilega vel út?

„Já það er niðurstaðan. Nú er ég bara að ganga frá minni skýrslu og svo förum við á Minjastofnun yfir næstu skref. Það verður unnið áfram í málinu.“

Þór mun vera með erindi á opnum fundi í félagsheimilinu í Bolungarvík í kvöld undir nafninu: Friðun húsa og lagaumhverfi.