Atlético vann níunda deildarleikinn í röð

Atlético Madríd heldur áfram að marsera í átt að spænska meistaratitlinum í knattspyrnu en liðið náði aftur sex stiga forskoti með 1-0 sigri á Valencia í dag.

Miðjumaðurinn öflugi Raúl García skoraði eina mark leiksins á 43. mínútu og enn og aftur var það frábær varnarleikur sem tryggði toppliðinu stigin þrjú.

Atlético er búið að vinna níu leiki í röð í deildinni með markatölunni 14-1 og hefur haldið hreinu í átta af níu þeirra leikja. Þetta var jafnframt 20. leikurinn á tímabilinu sem liðið heldur marki sínu hreinu. Magnaður árangur.

Gestirnir urðu fyrir smá áfalli í uppbótartíma þegar bakvörðurinn Juanfran Torres var rekinn af velli með beint rautt spjald en verði hann úrskurðaður í þriggja leikja bann er tímabilinu hjá honum lokið.

Atlético er sem fyrr segir á toppi spænsku 1. deildarinnar með 88 stig eftir 35 leiki og á þrjá leiki eftir en Real Madrid er með 82 stig og á fjóra leiki eftir.

Barcelona er með 81 stig og getur með sigri á Villareal í kvöld minnkað forskot Atlético niður í fjögur stig en Börsungar eiga þrjá leiki eftir líkt og toppliðið eftir umferðina sem klárast í kvöld.