Risavaxið fjölskylduboð haldið á nýárskvöld

„Ég ætlaði upphaflega að halda þetta partí á gamlárskvöld en áttaði mig svo á því að á Íslandi er fólk frekar með fjölskyldunni sinni á þessu kvöldi. Þess vegna færði ég það yfir á 1. janúar,“ segir bandaríski auðmaðurinn og samfélagsmiðlagúrúinn Oliver Luckett.

Hann ætlar að halda heljarinnar gleðskap á Lavabarnum á nýársdagskvöld en hann hélt einmitt upp á afmælið sitt hér á landi síðastliðið sumar með miklum glæsibrag. „Afmælisveislan mín heppnaðist rosalega vel og þeir félagar mínir sem komust ekki þá vildu koma til Íslands að vetrarlagi. Ísland er einstaklega fallegt land og sérstaklega á veturnar,“ segir Luckett sem kann vel við sig á Fróni.

Luckett er stofnandi theAudience, sem er eins konar miðlunar- og dreifingarnet fyrir afþreyingarfyrirtæki sem vilja ná árangri í notkun samfélagsmiðla. Á meðal viðskiptavina hans eru Barack Obama, forseti Bandaríkjanna, og bandaríska tónlistarkonan Azealia Banks.

Það verður þó ekki eingöngu gleðskapur um kvöldið sem Luckett stendur á bak við því hann verður einnig með kvöldverðarboð á sinni könnu. „Þetta er eins og risastór fjölskyldukvöldverður sem endar með partíi,“ segir Luckett.

Boðið verður á Sakebarnum og Veiðikofanum og þaðan verður farið á Lavabarinn.

Þá ætlar Luckett einnig að flytja inn sína uppáhaldsplötusnúða, Wonkers, alla leið frá Berlín. Einnig munu fleiri listamenn koma fram í partíinu.

Hann er einstaklega hrifinn af Íslendingum og íslenskri tónlist. „Ég elska að leiða hina ýmsu listamenn saman og uppgötva nýja íslenska tónlistarmenn,“ segir Luckett. Hann lítur á Ísland sem sitt annað heimili. „Þetta er í fimmta skiptið sem ég kem til Íslands á einu ári,“ segir Luckett og hlær.

Gera má ráð fyrir að ýmsir þekktir Íslendingar muni láta sjá sig í partíinu en auðmaðurinn vildi ekkert tjá sig um hverjir væru á gestalistanum. Á meðal þeirra sem mættu í afmælisveislu Lucketts voru tónlistarmaðurinn Zebra Katz, Ghostigital, Jakob Frímann Magnússon, Ásdís Rán, Daniel Lismore, Ragnar Kjartansson, Högni Egilsson, Hrafnhildur Arnardóttir, Erpur Eyvindarson og Gísli Pálmi. Miðasala á viðburðinn er á midi.is.

Einar Örn Benediktsson tónlistarmaður hefur þekkt Luckett í fimm ár og kann vel við hann.

„Hann er svona samfélagsmiðlagúrú og kom með nýja hugsun um hvernig nýta megi samfélagsmiðlana á góðan hátt og hvernig hægt sé að byggja upp tengslanet og annað. Við erum ágætisfélagar og kynntumst þegar ég tók hann í heimsókn hingað til lands fyrir um fimm árum. Hann safnaði íslenskri list og ég fór með hann í heimsóknir til íslenskra listamanna og kynnti hann fyrir íslenskri list,“ útskýrir Einar Örn.

Hann kom fram í afmælisveislunni hans sem haldin var í Gamla bíói síðastliðið sumar. „Þetta var skemmtilegt afmæli, stemningin var orðin sérstaklega góð þegar ég var búinn að að spila,“ segir Einar Örn og hlær.