Ráðherra segir lög á verkfall lækna ekki leysa vandann

Ekkert hefur verið rætt um lagasetningu á verkfall lækna og skurðlækna í ríkisstjórninni eða heilbrigðisráðuneytinu, að sögn Kristjáns Þórs Júlíussonar heilbrigðisráðherra.

„Það myndi ekki leysa vandann,“ segir Kristján í samtali við Fréttablaðið.

Verkfall lækna hefur nú staðið yfir í 59 daga en síðustu verkfallslotu fyrir jól lýkur í dag. Læknar samþykktu á þriðjudag auknar verkfallsaðgerðir eftir áramót, en loturnar munu þá standa yfir í fjóra daga í senn í stað tveggja.

Helgi Kjartan Sigurðsson, formaður Skurðlæknafélags Íslands, sagði í samtali við Stöð 2 á þriðjudag að með þeim myndu allar skurðaðgerðir falla niður, alla daga vikunnar utan föstudaga.

Aðspurður hvort svo víðtæk vinnustöðvun hjá læknum eins og boðuð er stefni ekki almannahagsmunum í hættu og réttlæti þar af leiðandi að minnsta kosti umræðu um lagasetningu segist ráðherra vilja meta stöðuna dag frá degi.

„Ég ber ennþá þá von í brjósti að samningsaðilar komist að einhverri niðurstöðu. Þau sjá það beggja vegna borðsins hversu brýnt þetta er orðið. Ég er ekki kominn á þann stað að ég trúi því ekki að við náum saman,“ segir Kristján Þór.

Verkfallið hefur nú þegar haft víðtæk áhrif á rekstur spítala og heilsugæslustöðva landsins. Rúmlega 700 aðgerðum hefur verið frestað, 500 skurðaðgerðum og um 200 sértækum aðgerðum. Yfir tvö þúsund dag- og göngudeildarkomum hefur verið frestað og heilsugæslan á höfuðborgarsvæðinu fær falleinkunn í athugun á þjónustu hennar.