Kort afhjúpa leyndardóma

Vísindamenn hafa búið til stafræn kort af jörðinni undir hinu forna mannvirki Stonehenge á Englandi. Tilgangurinn er að leysa ráðgátuna um Stonhenge, sem er á heimsminjaskrá UNESCO.

Unnin voru sautján nákvæm kort sem sýna áður óþekkt mannvirki á svæðinu sem búin voru til fyrir helgisiði, auk stórrar timburbyggingar. Talið er að hún hafi verið notuð fyrir jarðarfarir.

„Ný mannvirki hafa verið afhjúpuð og einnig nýjar tegundir mannvirkja sem fornleifafræðingar hafa aldrei séð áður,“ sagði Vincent Gaffney, prófessor við Birmingham-háskóla og stjórnandi rannsóknarinnar.

Einnig fannst stór, forsöguleg gryfja, sem virðist hafa tengst sólinni.

Wolfgang Neubauer, prófessor hjá fornleifastofnun í Vínarborg, segir að með nýju kortunum verði í fyrsta sinn mögulegt að finna út hvernig Stonehenge og landslagið á svæðinu hefur þróast í gegnum aldirnar.

Fornleifafræðingar hafa stundað uppgröft á Stonehenge-svæðinu og velt fyrir sér tilurð þess síðan á sautjándu öld. Um 1,2 milljónir ferðamanna koma þangað á hverju ári.