Viðbragðsher NATO fær höfuðstöðvar í A-Evrópu

Leiðtogar Atlantshafsbandalagsins samþykktu í gær að stofna nokkur þúsund manna viðbragðssveitir sem hafi höfuðstöðvar í Austur-Evrópu. Þessar sveitir verði hægt að senda með stuttum fyrirvara til átakasvæða fari svo að eitthvert aðildarríkjanna verði fyrir árás.

„Með þessu eru send skýr skilaboð til allra sem gætu orðið líklegir til að gera árás: Þótt þið gerið ekki annað en að íhuga árás á eitt aðildarríkjanna, þá þurfið þið að fást við bandalagið allt,“ sagði Anders Fogh Rasmussen, framkvæmdastjóri NATO, á leiðtogafundinum í Wales í gær.

Þessi skilaboð eru ekki síst ætluð Rússum, sem hafa leynt og ljóst stutt uppreisnarmenn í austanverðri Úkraínu í átökum sem kostað hafa meira en 2.500 manns lífið.

Ekki hefur enn verið ákveðið hvar höfuðstöðvar viðbragðshersins verða, en Pólland, Rúmenía og Eystrasaltslöndin þrjú hafa lýst yfir áhuga á að hýsa þær.

Tveggja daga fundarhöldum NATO í Wales lauk í gær, en ákveðið var að næsti leiðtogafundur yrði haldinn í Varsjá í Póllandi árið 2016. Sú staðsetning er einnig hugsuð sem skýr skilaboð til rússneskra stjórnvalda, sem jafnan hafa kvartað hástöfum undan nærveru NATO í nágrannaríkjum Rússlands.

Leiðtogarnir hvöttu einnig til þess að framlög aðildarríkjanna til varnarmála yrðu tvö prósent af þjóðarframleiðslu. Einungis fjögur aðildarríkjanna standa undir þeirri kröfu nú, Bandaríkin, Bretland, Grikkland og Eistland. Pólverjar lýstu því yfir að þeir ætli sér að ná þessu markmiði árið 2016.