Ólafur Ingi líklega áfram hjá Zulte

„Maður veit svo sem aldrei en ég á enn tvö ár eftir af mínum samningi og sé ekki fram á annað en að vera áfram hér,“ segir landsliðsmaðurinn Ólafur Ingi Skúlason. Hann kom til Zulte-Waregem í Belgíu árið 2011 og átti þátt í miklum uppgangi þessa smáliðs frá Vestur-Flæmingjalandi.

„Við enduðum í fjórða sæti og þó svo að gengið hafi ekki verið jafn gott og í fyrra náðum við aftur í Evrópukeppnina og vorum í toppbaráttunni fram á síðustu umferðir,“ sagði Ólafur Ingi, sem er 31 árs, í samtali við Fréttablaðið í gær. Zulte-Waregem var hársbreidd frá titlinum í fyrra en endaði þá í öðru sæti eftir spennandi lokaumferð.

„Liðið spilaði alls 57 leiki í öllum keppnum á þessu tímabili og ég tók þátt í tæplega 50. Ég er því sáttur við minn hlut,“ segir hann en Ólafur Ingi var í byrjunarliðinu í níu af tíu leikjum liðsins í meistaraumspili deildarinnar í vor. Hann missti af síðasta leiknum vegna hnémeiðsla og þarf nú að hvíla vegna þeirra.

„Þetta er ekkert alvarlegt. Ég hef farið í stórar aðgerðir á hné eins og svo margir aðrir og get skrifað þetta bara á álag. Hnéð var bara fullt af vökva og ég verð í sprautumeðferð næstu vikurnar,“ segir Ólafur Ingi en hann missir af vináttuleikjum Íslands gegn Austurríki og Eistlandi af þeim sökum.

„Ég vil auðvitað gefa áfram kost á mér í landsliðið. Mitt hlutverk í því hefur aldrei verið stórt, enda eigum við marga stráka sem hafa verið að spila mjög vel. En ég er ávallt reiðubúinn að hjálpa til á hvaða máta sem er og tel frábært að geta lagt mitt af mörkum fyrir land og þjóð,“ segir Árbæingurinn og bætir við að hann stefni að því að spila minnst eitt tímabil hér á landi áður en hann hættir.

„Það er planið að spila með Fylkismönnum þegar ég kem heim – svo lengi sem líkaminn leyfir,“ bætir Ólafur Ingi við en vonast til að vera áfram í Belgíu með fjölskyldu sinni á meðan atvinnuferillinn stendur yfir.

„Við erum með þrjú börn og líður mjög vel. Það er erfitt að flytja með svo stóra fjölskyldu og við viljum því vera hér í Belgíu þangað til að við ákveðum að halda aftur heim til Íslands.“