Heilbrigðisnefnd Hafnarfjarðar- og Kópavogssvæðis leggst gegn því að Orkuveitan fái undanþágu frá hertum reglum um styrk brennisteinsvetnisins.
„Sérhver ákvörðun um að draga úr kröfum um hámarksstyrk brennisteinsvetnis í andrúmslofti þarf að byggja á sterkum grunni, þar sem hafa þarf í huga afar rík varúðarsjónarmið varðandi heilsu íbúa nærliggjandi byggða. Heilbrigðisnefnd er ekki kunnugt um rannsóknir sem gefa tilefni til breytinga á reglugerðinni,“ segir heilbrigðisnefndin.
Sérstök athygli er vakin á brennisteinsmengun við Waldorfskóla í Lækjarbotnum þar sem styrkurinn hefur mælst yfir leyfilegum mörkum.
„Mótvægisaðgerðir vegna skólahalds í Lækjarbotnum hafa ekki verið kynntar heilbrigðisnefnd og eru því enn frekari rök er mæla með að undanþágunni verði hafnað,“ segir heilbrigðisnefndin. Bæjarráð Kópavogs tekur undir að ekki eigi að veita undanþáguna og skorar á Orkuveituna að bregðast sem fyrst við með mótvægisaðgerðum vegna mengunar í Lækjarbotnum.
„Það veltur vitaskuld á því hvort styrkurinn mun fara yfir hin lækkuðu reglugerðarmörk, sem vissulega eru líkur á að gerist, og þá hvernig yfirvöld bregðast við,“ segir Hólmfríður áfram um afleiðingar þess að undanþágan fáist ekki.
Þá segir Hólmfríður Orkuveituna vinna eftir verkefnisáætlun um mótvægisaðgerðir sem kynnt hafi verið fyrir um ári.
„Á næstu vikum verður tekin í notkun gasskiljustöð við Hellisheiðarvirkjun og tilraunir hefjast á niðurdælingu á brennisteinsvetni frá einum hverfli virkjunarinnar,“ útskýrir Hólmfríður sem kveður þar um að ræða 15 prósent af brennisteinsvetninu.
„Að hreinsa útblásturinn og dæla brennisteinsvetninu aftur niður í jarðlögin er hagkvæmasta og langumhverfisvænsta lausnin sem skoðuð hefur verið. Við bindum miklar vonir við hana en við viljum fá reynslu á rekstur þessarar stöðvar áður en ráðist verður í stækkun,“ segir umhverfisstjórinn. Samhliða séu ýmsar aðrar lausnir skoðaðar, meðal annars að nýta brennisteinsvetnið til iðnaðar og að brenna það.
