Ekki svigrúm fyrir nýjum spítala að mati Bjarna

Bjarni Benediktsson, fjármála- og efnahagsráðherra, telur engan ágreining vera um nauðsyn þess að byggja upp nýjan spítala. Ekki er þó svigrúm á næstu tveimur til þremur árum, miðað við stöðu ríkisfjármála, að ráðast í framkvæmdir. Þetta sagði hann í umræðum á Alþingi í morgun.

Í umræðunum gagnrýndi Bjarni aðkomu fyrri stjórnvalda að málinu. „Það var aldrei neitt plan til. Þetta voru aldrei neitt annað en stór orð og áætlanir,“ sagði hann og benti á að framkvæmdirnar séu í fimm áföngum og muni kosta upp undir áttatíu milljarða króna.

„Það er ekki svigrúm fyrir það á næstu tveimur til þremur árum miðað við þann afgang sem við horfum fram á að geti myndast í ríkisfjármálunum og þá þarf að finna einhverjar aðrar leiðir,“ sagði Bjarni í umræðunum. Hann sagði að það kæmi til greina að nýta arð af eignum í verkefnið.

Áður hefur Bjarni útilokað að andvirði af sölu eigna verði nýtt til byggingarinnar. „Þær eignir sem ég sé fyrir mér að geti komið til sölu á næstunni er sérstaklega eignir eins og hlutur ríkisins í Landsbankanum en ég tel að andvirði þeirrar sölu eigi fyrst og fremst að ganga til endurgreiðslu á því láni sem tekið var til þess að eignast bankann,“ útskýrði hann í þinginu í dag.