Svona eiga karlmenn að dansa til að heilla konur

Vísindamenn hjá Northumbria-háskóla í Bretlandi og Gottingen-háskóla í Þýskalandi vildu kanna hvernig karlmenn ættu að dansa til að heilla konur. Til þess að komast að því fengu þeir þrjátíu karlmenn til að dansa við taktfasta tónlist í þrjátíu sekúndur. Sagt er frá þessu á vef Washington Post.

Karlmennirnir fengu engar sérstakar leiðbeiningar um hvernig þeir ættu að dansa og voru hreyfingar þeirra teknar upp með hreyfiskynjaratækni. Hreyfingar karlmannanna voru síðan færðar yfir á kynlausa veru.

Hér sést þessi kynlausa vera túlka góðan dansara:

Og hér sést hún túlka slæman dansara:

Munurinn er augljós en það sem nákvæmlega heillar konur eru karlmenn sem hreyfa höfuð, háls og búk á áberandi hátt samkvæmt rannsókninni. Þá skiptir fótafimi líka máli og þykir það sérstaklega heillandi að beygja og teygja hægra hné. Hreyfingar vinstri fótar þykja hins vegar ekki eins heillandi.

Það sem kemur einnig á óvart í rannsókninni er að handahreyfingar skipta engu sérstöku máli í þessu samhengi.

Vísindamennirnir vilja hins vegar brýna fyrir fólki að fleiri rannsóknir þurfi að gera til að komast að nákvæmari niðurstöðu um hvaða danshreyfingar heilli mest.