Fjórir milljarðar í fjárhagsaðstoð Reykvíkinga

Á næsta ári munu tæplega sex hundruð Reykvíkingar missa bótarétt sinn hjá Vinnumálastofnun eftir þriggja ára bótatímabil.

Árið 2015 munu tæplega átta hundruð bætast í hópinn. Gert er ráð fyrir að einhver hluti hópsins fái atvinnu en búast má við að nokkuð stór hluti verði háður framfærslu frá borginni.

Velferðarsvið Reykjavíkurborgar áætlar fjóra milljarða í fjárhagsaðstoð á árinu 2014 til að mæta þörf þessa hóps. Það er um það bil fjögur hundruð milljóna króna hækkun frá því á síðasta ári. Hækkunin er þó ekki sérlega mikil í hlutfalli við fjölgun þeirra sem missa bótarétt.

„Borgin hefur náð miklum árangri með vinnumarkaðsaðgerðum síðasta árið og við gerum ráð fyrir að þau úrræði haldi áfram að skera niður þann fjölda sem þarf á fjárhagsaðstoð að halda. Við gerðum spá um fjölda sem þurfti fjárhagsaðstoð árið 2013 en notuðum ekki allt það fjármagn sem við áætluðum. Við spöruðum í staðinn um sex hundruð milljónir með því að koma fólki í vinnu,“ segir Björk Vilhelmsdóttir, borgarfulltrúi Samfylkingar og formaður velferðarráðs.

Sveitarfélagi er skylt að veita fjárhagsaðstoð til framfærslu einstaklinga og fjölskyldna sem ekki geta séð sér og sínum farborða án aðstoðar. Til að hafa rétt til aðstoðar þurfa einstaklingar að hafa tekjur og eignir undir ákveðnum viðmiðunarmörkum. Fjárhagsaðstoð til einstaklings getur verið allt að 163.625 krónur á mánuði og 245.453 á mánuði til hjóna eða sambúðarfólks. Ef maki er með laun yfir viðmiðunarmörkum missir einstaklingur rétt til framfærslustyrks. 

„Á síðasta ári byrjuðum við með verkefni sem heitir Liðsstyrkur. Þá settum við fókus á hópinn sem var að klára bótarétt sinn og búinn að vera atvinnulaus í þrjú ár,“ segir Hrafnhildur Tómasdóttir, sviðstjóri yfir vinnumiðlun og ráðgjöf hjá Vinnumálastofnun. 

„Það tókst að skapa störf fyrir þriðjung, þriðjungur fann ekki úrlausn sinna mála og er hluti af þeim hópi kominn til sveitarfélaga og þriðjungur skráði sig ekki til þátttöku og getum við ekki vitað um afdrif þeirra einstaklinga. Það er sannarlega ástæða til að skoða þennan hóp nánar.“ 

Vinnumálastofnun hefur gert samkomulag við sveitarfélögin að halda áfram að þjónusta þennan hóp atvinnuleitenda, þeirra sem teljast vinnufærir en án þess að hafa bótarétt, með ráðgjöf og virkniúrræðum.