Sífellt fleiri á framfærslu borgarinnar

Heildarfjöldi þeirra sem fékk einhverja tegund fjárhagsaðstoðar árið 2013 í Reykjavík var 4.218 notendur. Í flestum tilfellum var fjárhagsaðstoðin í formi framfærslustyrks, eða í 3.350 tilfellum, en einnig framfærsla vegna náms, aðstoð vegna barna, tannlæknastyrkur, húsbúnaðarstyrkur, útfararstyrkur og svo framvegis.

Þetta kemur fram á minnisblaði vegna aðgerðaáætlunar Velferðarsviðs sem lagt var fyrir velferðarráð Reykjavíkurborgar á fundi í gær.

Atvinnulausum án bótaréttar fjölgaði um 231 frá 2012 til 2013 en atvinnulausum með bótarétt fækkaði um 276 á sama tíma. Skýringu á mikilli fjölgun atvinnuleitenda án bótaréttar má rekja til þess að bráðabirgðarákvæði við lög um atvinnuleysistryggingar um fjögurra ára bótarétt féll úr gildi þann 1. janúar 2013. Við þá breytingu misstu tæplega 900 Reykvíkingar bótarétt sinn hjá Vinnumálastofnun.

Því hefur þróunin orðið sú að atvinnulausum með bótarétt fækkar en að sama skapi fjölgar þeim sem fá fjárhagsaðstoð hjá borginni, eins og sést á töflu.

„Auðvitað tekur sveitarfélagið við þeim sem missa bótaréttinn,“ segir Áslaug Friðriksdóttir, borgarfulltrúi sjálfstæðisflokksins. „En við teljum að meirihlutinn hafi ekki tekið nógu vel á þessum vanda. Það fóru einhverjar aðgerðir alltof seint í gang og í því ferli varð ljóst hversu svifaseint stjórnkerfið er. Fyrir vikið hefur orðið til mikill uppsafnaður velferðarvandi í Reykjavík sem nauðsynlegt er að bregðast betur við.“

Samkvæmt Fjármálaskrifstofu Reykjavíkurborgar varð Reykjavík fyrir mesta skellinum í fækkun starfandi og atvinnuleysishlutfalli. Í Reykjavík voru rúmum fjögur prósentum færri starfandi í janúar 2013, miðað við árið 2007, en í öðrum sveitarfélögum á höfuðborgarsvæðinu eru rúmum tveimur prósentum fleiri starfandi frá 2007. 

„Atvinnuleysi í Reykjavík er mun hærra en annars staðar, störfum fjölgar mun hægar og um leið safnast upp mikill velferðarvandi. Það þarf að taka þetta fastari tökum,“ segir Áslaug.

Flestir sem fá framfærslu frá borginni eru á aldursbilinu 18-39 ára en fæstir eru eldri en 60 ára. 40 prósent notenda fá framfærslu vegna atvinnuleysis án bótaréttar, 28 prósent eru sjúklingar, 12 prósent eru atvinnulausir með bótarétt og aðrir eru öryrkjar, nemar, í launaðri vinnu eða fæðingarorlofi. 

494 notendur höfðu verið með framfærslu í 12 mánuði eða lengur í desember 2013 og eru flestir í þeim hópi sjúklingar og atvinnulausir án bótaréttar.

„Atvinnuleysi í Reykjavík er mun hærra en annars staðar, störfum fjölgar mun hægar og um leið safnast upp mikill velferðarvandi. Það þarf að taka þetta fastari tökum,“ Áslaug Friðriksdóttir, borgarfulltrúi Sjálfstæðisflokksins.