Defoe skoraði tvö í frumrauninni í MLS | Myndband

Enski framherjinn Jermaine Defoe sem spilar með kanadíska liðinu Toronto FC í bandarísku MLS-deildinni í knattspyrnu fer vel af stað með sínu nýja liði.

Toronto spilaði ekki í fyrstu umferð deildarinnar sem hófst fyrir rúmri viku og biðu allir fullir eftirvæntingar eftir leik Toronto og Seattle Sounders á laugardaginn.

Liðin eru bæði mjög vel mönnuð og líkleg til árangurs í sumar en Clint Dempsey, fyrrverandi leikmaður Fulham, og Nígeríumaðurinn ObafemiMartins, fyrrverandi leikmaður Inter og Newcastle, er á mála hjá Seattle.

Toronto-menn eyddu miklum peningum í liðið sitt á undirbúningstímabilinu og fengu meðal annars bandaríska landsliðsmanninn MichaelBradley frá Roma á Ítalíu og brasilíska landsliðsmarkvörðinn JulioCésar frá QPR.

Svo átti liðið stærstu félagaskipti vetrarins þegar það fékk Jermaine Defoe frá Tottenham en hann er 14. markahæsti leikmaðurinn í sögu úrvalsdeildarinnar með 124 mörk.

Defoe sveik engan í frumraun sinni en hann skoraði strax eftir 16 mínútur þegar hann fékk sendingu frá Jonathan Osorio í gegnum vörn Seattle og kláraði færið sitt vel.

Aðeins sjö mínútum síðar áttu Seattle-menn slæma sendingu til baka sem Defoe hirti og skoraði með föstu skoti frá vítateigslínunni. Eitthvað sem hann hefur gert mörgum sinnum áður.

Hér að neðan má sjá fyrstu mörk Defoe í MLS-deildinni og aðrar svipmyndir úr leiknum en hann yfirgaf Tottenham í von um að fá meira að spila því hann vill komast með Englandi á HM í Brasilíu í sumar.