Landsmót hestamanna að Hólum í Hjaltadal

Stjórn Landssambands hestamannafélaga (LH) samþykkti í gær breytt staðarval á Landsmóti hestamanna 2016. Mótsstaðurinn verður færður frá Vindheimamelum að Hólum í Hjaltadal, en tillaga þess efnis var samþykkt samhljóða á fundi LH í gær. Fyrirhugaðir samningar miðast við þá staðsetninguna og er samþykktin með þeim fyrirvara að Gullhylur, sem hafði óskað eftir breyttri staðsetningu, sendi staðfestingu þess efnis til LH frá mennta- og menningarmálaráðherra og sveitarstjórn Skagafjarðar fyrir 22. desember 2014.

Landsmót var síðast haldið að Hólum árið 1966. „Því viðeigandi að fagna þeim tímamótum að slétt 50 ár séu liðin með því að halda glæsilegt Landsmót á þessum sögufræga stað að nýju. Á Hólum er glæsileg aðstaða fyrir hendi; mikill fjöldi hesthúsplássa, þrjár reiðhallir, mikið gistirými auk þess sem Sögusafn íslenska hestsins er að Hólum. Þar er einnig rekin æðsta menntastofnun íslenska hestsins í heiminum, en hestafræðideild Hólaskóla er opinber miðstöð menntunar og rannsókna á sviði hrossaræktar, tamninga, reiðmennsku og reiðkennslu á Íslandi,“ segir í tilkynningu frá stjórn Landssambands hestamanna.

Upp úr sauð á landsþingi LH í október og í kjölfarið sagði stjórnin af sér. Deilurnar snerust um landsmótsstað, en landsmót hestamannafélaga eru jafnan fjölsótt og fjöldi erlendra ferðamanna hefur jafnt og þétt aukist á mótinu. Taldi stjórnin það vera í takt við nútímann að huga að þörfum þeirra sem sækja mótin. „Sú þjónusta sem þarf að veita landsmótsgestum er aðeins fáanleg á tveimur stöðum á landinu, annars vegar á höfuðborgarsvæðinu og hins vegar á Akureyri, og við verðum að fara að horfast í augu við þann raunveruleika,“sagði Haraldur Þórarinsson fráfarandi formaður LH í samtali við Fréttablaðið.