Verður Clough föðurbetrungur í bikarnum?

Bikarævintýri Sheffield United, sem er í ellefta sæti ensku C-deildarinnar, heldur eitthvað áfram en í gær komst liðið áfram í undanúrslit eftir 2-0 sigur á Charlton. Lærisveinar Nigel Cloughs drógust svo gegn úrvalsdeildarliði Hull í undanúrslitum.

Leið Sheffield United í undanúrslitin hefur verið löng, en liðið hóf leik í fyrstu umferð bikarkeppninnar í nóvember þar sem liðið bar sigurorð af Colchester United. Cambridge United og úrvalsdeildarliðum Aston Villa og Fulham var svo rutt úr vegi áður en Nigel Clough og hans menn lögðu Nottingham Forest 3-1 á Bramall Lane, heimavelli sínum, í 16-liða úrslitunum.

Undanfarin ár hafa verið mögur hjá Sheffield United. Liðið féll úr ensku úrvalsdeildinni tímabilið 2006-07 og féll svo fjórum árum síðar niður í C-deildina. Tvö síðustu tímabil hefur liðið tapað í umspili um sæti í B-deildinni, en það verður að teljast ólíklegt að Sheffield komist þangað í ár en liðið er sem stendur í 11. sæti C-deildarinnar, ellefu stigum frá sæti í umspili. Bikarævintýrið er því kærkomið fyrir stuðningsmenn félagsins sem hefur fjórum sinnum lyft enska bikarnum, síðast árið 1925.

Nigel Clough, sem tók við liði Sheffield United í október, er sem kunnugt er sonur Brians Clough, eins sigursælasta þjálfara Englands. Á löngum þjálfaraferli vann Brian Clough nær alla titla sem í boði voru - nema ensku bikarkeppnina.

Tvö ár í röð, 1988 og 1989, tapaði Nottingham Forest undir stjórn Clough í undanúrslitum, bæði skiptin fyrir Liverpool. Árið 1991 komst Forest svo loks í úrslitaleikinn þar sem liðið mætti Tottenham í frægum leik. Forest komst yfir með marki fyrirliðans, Stuart Pearce áður en Paul Stewart jafnaði leikinn og það var svo í framlengingu sem sjálfsmark Des Walker réði úrslitum. Clough tókst því ekki að bæta við þessum eina titli sem vantaði í hans annars glæsilega safn.

En nú hefur sonurinn möguleika á að gera það sem föðurnum tókst aldrei. Líkurnar eru vissulega ekki miklar, en það væri heldur betur saga til næsta bæjar ef Nigel Clough stýrði C-deildarlið Sheffield United til sigurs í ensku bikarkeppninni.