Verk Erró í Álftahólum tekur á sig mynd

Vesturgafl íbúðarblokkarinnar við Álftahóla 4-6 verður öllu litríkari innan tíðar en þar er unnið hörðum höndum að uppsetningu veggmyndar eftir Erró. Listamaðurinn gefur Reykjavíkurborg höfundarverk sitt fyrir verkið sem er annað tveggja sem á að „fegra Efra-Breiðholt og auka stolt íbúanna af nærumhverfi sínu,“ eins og segir í lýsingu á heimasíðu Reykjavíkurborgar.

Hitt verk Errós verður á bogadregnum vegg við íþróttahúsið við Austurberg. Gunnar V. Andrésson, ljósmyndari Fréttablaðsins og Vísis, fylgdist með vinnu við uppsetningu verksins við Álftahóla í vikunni og tók meðfylgjandi myndir.

Skiptar skoðanir eru meðal íbúa í Breiðholti um þann kostnað sem fer í verkin tvö. Þótt Erró gefi höfundarverk sitt er kostnaður vegna framleiðslu og uppsetningu áætlaður 38,8 milljónir króna.

„Þar fyrir utan er þetta óþarfa gjörningur, fyrir þennan pening mætti gera gagn fyrir Breiðholtið. Bæta aðstöðu nemenda í skólunum, uppbyggingu íþróttahúss, salt í grautinn og svo mætti lengi telja. Mér finnst þetta eiginlega bara hræsnisframkvæmd,“ segir einn íbúa Breiðholts í þræði á síðunni Íbúasamtökin Betra Breiðholt á Facebook.

Töluverðar umræður hafa skapast um framkvæmdina á síðunni og ber bæði á óánægjuröddum hjá þeim sem telja að peningunum sé varið í ranga hluti og eins hjá þeim sem gagnrýna hve illa sýnilegt verkið verði.

Vesturgaflinn á Álftahólum 4-6 stendur nokkuð þétt upp við aðra nokkuð lægri byggingu. Því verður aðeins efri hluti verksins sýnilegur sem nokkrir íbúar í Breiðholti eru ósáttir við.

„Var búinn að benda á strax við fyrstu kynningu , að myndin myndi alls ekki öll verða sjáanleg vegna nálægðar við næstu blokk,“ skrifar annar íbúi í Breiðholti í færslu á fyrrnefndri Facebook-síðu.

Telja margir að þar hafi skipuleggjendum í borginni orðið á í messunni en hið rétta er að markmiðið frá upphafi var að verkið væri aðeins að hluta sýnilegt úr fjarlægð.

Efri hluti myndarinnar sést úr fjarlægð og „þannig myndi listaverkið kalla fólk langt að og bjóða því inn í hverfið, þar sem það fengi að njóta heildarmyndarinnar,“ eins og segir á heimasíðu Reykjavíkurborgar.

Fígúrurnar úr myndinni á gafli Álftahólablokkarinnar verða svo stækkaðar á bogadregna vegginn við Austurberg.