Eiður skoraði í sigri Club Brügge

Eiður Smári Guðjohnsen skoraði fyrir Club Brügge sem bar 2-0 sigurorð af Zulte-Waregem í lokaumferð úrslitakeppninnar um belgíska meistaratitilinn í fótbolta í dag.

Eiður kom Club Brügge yfir strax á 9. mínútu og Nicolas Castillo bætti við marki þegar 15 mínútur voru til leiksloka. Ólafur Ingi Skúlason sat allan tímann á varamannabekk Zulte-Waregem.

Club Brügge endaði í þriðja sæti úrslitariðilsins, með einu stigi minna en Standard Liege. Anderlecht endaði í efsta sæti riðilsins, tveimur stigum á undan Standard og þremur á undan Club Brügge.

Þetta var 33. meistaratitill Anderlecht, sem fer beint í riðlakeppni Meistaradeildar Evrópu að ári. Standard fer í forkeppni Meistaradeildarinnar og Club Brügge, Zulte-Waregem, sem endaði í fjórða sæti úrslitariðilsins, fara í Evrópudeildina ásamt bikarmeisturum Lokeren og Oostende, sem vann sér þátttökurétt í sérstöku Evrópuumspili.

Úrslit dagsins:

Club Brügge 2-0 Zulte-Waregem

Anderlecht 3-1 Lokeren

Standard Liege 1-0 Genk

Lokastaðan í úrslitariðlinum:

1. Anderlecht - 51 stig

2. Standard Liege - 49 stig

3. Club Brügge - 48 stig

4. Zulte-Waregem - 41 stig

5. Lokeren - 34 stig

6. Genk - 32 stig