Sjúkraþjálfari Englands meiddist í fagnaðarlátum

Enska landsliðið í knattspyrnu varð ekki einungis fyrir miklu áfalli inni á vellinum í gærkvöldi þegar liðið lá, 2-1, fyrir Ítalíu, því eftir leikinn staðfesti landsliðsþjálfarinn Roy Hodgson að sjúkraþjálfari liðsins, Gary Lewin, væri á heimleið vegna meiðsla.

Lewin meiddist í fagnaðarlátunum eftir jöfnunarmark Daniels Sturridge á 38. mínútu. Hann stökk þá upp, lenti á vatnsflösku og sneri sig á ökkla. Lewin var borinn af leikvelli og nú er ljóst að hann er leið aftur til Englands vegna þessara meiðsla.

Lewin, sem er fimmtugur, var áður sjúkraþjálfari hjá Arsenal í á þriðja áratug. Hann hefur starfað fyrir enska landsliðið frá árinu 1996.