Fjölmiðlar í Argentínu særðu Messi

Lionel Messi hefur ekki alltaf náð sér á strik með argentínska landsliðinu og hann viðurkennir að hafa orðið sár vegna þeirrar gagnrýni sem hann hefur mátt þola í heimalandi sínu.

Messi er þegar búinn að spila 83 landsleiki fyrir Argentínu og var í liðinu á HM 2006 og 2010. Fjölmiðlar í Argentínu hafa sakað hann um að hafa minni metnað fyrir landsliðinu en Barcelona.

Messi segir það vera alrangt. Hann væri til í að fórna öllum einstaklingsverðlaunum sínum fyrir gull á HM.

"Ég las alla þessa gagnrýni. Að ég hefði ekki áhuga á að spila fyrir landsliðið, að ég syngi ekki þjóðsönginn og væri sama um búninginn. Það særði mig að lesa þetta og margir voru mjög ósanngjarnir í minn garð," sagði Messi.

"Argentína er mitt land og mín fjölskylda. Ég myndi skipta öllum mínum verðlaunum út til þess að gera landa mína ánægða."