Van Gaal: Rooney er sigurvegari

Louis van Gaal var að vonum ánægður með sigurinn á Liverpool á Champions Cup í nótt. United vann leikinn 3-1, með mörkum frá Wayne Rooney, Juan Mata og Jesse Lingard í seinni hálfleik, en Steven Gerrard hafði komið Liverpool yfir með marki úr vítaspyrnu í fyrri hálfleik.

Á blaðamannafundi eftir leikinn hrósaði Hollendingurinn Wayne Rooney í hástert, en framherjinn bar fyrirliðabandið í leiknum gegn Liverpool.

„Hann er sigurvegari,“ sagði van Gaal sem sagði að Rooney hefði átt skilið að vera valinn maður mótsins.

„Hann átti skilið að fá þessi verðlaun því hann átti margar stoðsendingar og skoraði mörk.

„En við vörðumst líka vel - það voru margir varnarmenn sem hefðu einnig getað verið valdir bestu leikmenn mótsins,“ sagði van Gaal og bætti við:

„Markið sem Rooney skoraði var mjög mikilvægt. Þetta var dásamlegt mark. Sóknin var góð og Rooney gerði vel í að koma boltanum framhjá markverðinum og í markhornið. Fyrirgjöfin frá Javier Hernandez var líka frábær.“

Hollendingurinn sagðist þó vera með báða fæturna á jörðinni þrátt fyrir gott gengi United á undirbúningstímabilinu og bætti við að öll einbeiting væri á fyrsta leikinn í ensku úrvalsdeildinni, gegn Swansea 16. ágúst næstkomandi.

„Auðvitað er betra að vinna en tapa á undirbúningstímabilinu, en leikurinn gegn Swansea er sá mikilvægasti. Það er leikurinn sem við þurfum að vinna,“ sagði van Gaal að lokum.