Bæði AZ og Sampdoria töpuðu

Íslendingaliðið AZ Alkmaar var að sætta sig við tap, 2-1, gegn Twente í mikilvægum slag í hollensku úrvalsdeildinni í dag.

AZ leiddi 0-1 í hálfleik en Twente jafnaði 20 mínútum fyrir leikslok og skoraði svo sigurmarkið í uppbótartíma.

AZ situr því sem fastast í sjöunda sæti deildarinnar en Twente er í fjórða sæti og skammt frá næstu liðum.

Aron Jóhannsson var í byrjunarliði AZ en fór af velli á 60. mínútu fyrir Jóhann Berg Guðmundsson.

Birkir Bjarnason fékk svo ekkert að spila er lið hans, Sampdoria, steinlá, 3-0, gegn Atalanta. Sampdoria er í 13. sæti ítölsku úrvalsdeildarinnar.