Hópurinn hefur tekið þessu sem erfiðu verkefni

Ísland tekur á móti Möltu á Laugardalsvelli í kvöld í undankeppni Heimsmeistaramótsins 2015. Ísland vann fyrri leik liðanna örugglega 8-0 og er því gerð krafa um þrjú stig í kvöld. Dóra María Lárusdóttir var nokkuð bjartsýn þegar Fréttablaðið heyrði í henni í gær.

„Malta er með tiltölulega nýtt lið í kvennaknattspyrnu að taka þátt í sinni fyrstu keppni. Við unnum leikinn örugglega úti og við þurfum að ná í þrjú stig í kvöld því við ætlum okkur annað sætið í riðlinum,“ sagði Dóra María sem var ánægð með leik íslenska liðsins gegn Danmörku.

„Þetta var með betri leikjum sem við höfum spilað við Danmörku. Þær eru með sterkt lið, vel spilandi og við tökum stig þar þótt við vildum auðvitað fá þrjú stig. Við verðum að ná þremur stigum á morgun, vonandi getum við skorað snemma til að létta pressuna en við þurfum að búa okkur undir hvað sem er,“ sagði Dóra María.

Í vikunni var greint frá því að Mist Edvardsdóttir, liðsfélagi Dóru Maríu í íslenska landsliðinu og Val, hefði greinst með krabbamein á dögunum.

„Hópurinn hefur tekið þessu sem erfiðu verkefni sem þarf að takast á við og við munum styðja hana í gegnum þetta. Hún er þvílíkur nagli og það er ekki hægt annað en að dást að því hvernig hún hefur tekið þessu. Maður veit ekki hvað lífið ber í skauti sér og maður verður að nýta hvern dag og njóta,“ sagði Dóra María sem var fullviss um að Mist myndi sigra í baráttunni.

„Maður missir góðan félaga af vellinum en hún er sterkur karakter og hún mun koma tvíefld til baka. Ég hef enga trú á öðru,“ sagði Dóra María.