Ólíklegt að Suarez sýni sparihliðarnar

Oscar Tabarez, landsliðsþjálfari Úrúgvæ, telur ólíklegt að Luis Suarez, leikmaður Úrúgvæ og Liverpool, muni ná að sýna sitt rétta andlit á Heimsmeistaramótinu í sumar.

Stuttu fyrir mót neyddist Suarez til þess að fara í aðgerð á hné og hefur hann verið í kapphlaupi við tímann að ná sér að fullu áður en Heimsmeistaramótið hæfist. Suarez sat hjá í neyðarlegu tapi Úrúgvæ gegn Kosta Ríka en gæti tekið þátt í leiknum gegn Englandi í kvöld.

Tabarez vildi ekki opinbera hvort Suarez færi beint inn í byrjunarliðið en reyndi að draga úr væntingum. Minnti hann á að Suarez væri nýkominn úr aðgerð og að ólíklegt væri að hann gæti sýnt sínar bestu hliðar að svo stöddu.

„Ef hann tekur þátt í leiknum þá er ólíklegt að hann sýni sínar bestu hliðar en hann er mikilvægur leikmaður. Endurhæfingin gengur vel og það er ekkert til fyrirstöðu að hann taki þátt. Luis hefur tekið á öllum áskorunum sem hafa komið fyrir hann og leyst málið vel,“ sagði Tabarez