Tileinkaði sigurinn markverðinum með rakvélablaðið

Síle skellti heims- og Evrópumeisturum Spánar, 2-0, á heimsmeistaramótinu í knattspyrnu í gærkvöldi eins og flestum er kunnugt.

Þetta var fyrsti leikur Síle á Maracana-leikvanginum sögufræga í Ríó í 25 ár, eða síðan rakvélablaðsskandallinn kom upp 3. september 1989.

Brasilía og Síle áttust þá við í undankeppni HM 1990 sem haldin var á Ítalíu. Brassar voru 1-0 yfir þegar blysi var hent inn á völlinn sem lenti nálægt markverði Síle, RobertoRojas.

Rojas féll til jarðar og virtist sem svo að blysið væri ástæða þess. Andlit hans var alblóðugt og neyddist argentínskur dómari leiksins að flauta hann af.

Daginn eftir sönnuðu ljósmyndir og sjónvarpsupptökur það sem Rojas játaði síðar, að blysið fór ekki í hann heldur skar hann sig sjálfur til blóðs með rakvélablaði sem hann geymdi í öðrum markmannshanskanum.

Rojas fékk lífstíðarbann frá knattspyrnu fyrir athæfið og var Síle meinuð þátttaka í undankeppni HM 1994. Nú er öldin aftur á móti önnur og er Síle komið áfram í útsláttarkeppni HM annað skiptið í röð.

„Já, það er satt. Maracana hefur mikla þýðingu fyrir fótboltann í Síle út af þessu atviki en það er kominn tími til að fara að gleyma þessu,“ sagði markvörðurinn ClaudioBravo við vef FIFA eftir leikinn.

„Þetta var slæmt atvik sem ég sjálfur tengi við því þetta kom fyrir markvörð. Ég býst við að þessi leikur [gegn Spáni] hafi verið mjög sérstakur fyrir Roberto. Ég tileinka honum því að hluta til sigurinn. Fótboltinn gefur þér stundum tækifæri til að snúa við blaðinu og þetta er sönnun þess,“ sagði Claudio Bravo.

Atvikið frá 1989: